笨媽媽

預備出門上班時，女兒剛睡醒，花了幾分鐘跟她說說話，我就要趕出門去了。

踏進地鐵車站入口，隱約聽到一聲＂媽咪＂，呆了，定神再想，不會吧，雖則就在街角，但那聲音也要轉兩個彎才到啊！

已在樓梯向下走的我，還是不大安心，決定掉頭往回走。走到街角，遙望睡房窗口，女兒不在。於是拿出電話，發了個短訊給女傭，問＂剛才是否女兒喊我？＂

不久後收到回覆，＂是，她現在在哭啦＂。

那一刻，只想回家，很想回家，把女兒緊緊抱在懷裡。想著女兒在哭，我眼眶也紅了，撥通女傭的電話，只聽到女兒的哭聲，都怪做媽媽的我太大意，女兒沒奔出門口送我，多半還賴在床上啊，怎麼沒想到她會在窗邊等，我跟我揮手道別？

小小人兒一定心傷得很，看著媽媽頭也不回消失於街角，聲嘶力竭地喊了一聲＂媽咪＂，我的心還在痛著。

九唔搭八雞

呢個係 Sally's Kitchen & Bakery 個 ＂香橙焗雞＂ 懶人版。

原裝正版喺呢度！http://sallykitchenbakery.blogspot.hk/2014/01/blog-post_24.html

材料

雞、橙皮、蒜蓉、雜草（立立雜雜香草），用鹽麴撈勻，幫隻雞裡裡外外（包括皮下），切底按摩。醃三個鐘。

做法：
光波爐 220度焗20分鐘
反轉再焗20分鐘
筷子篤大脾，冇血水就OK！

下次過年打屎我都唔買定咁多餸，日日都要煮！

聽日仲有牛腩添！救命！

小插曲：

唔知娘親係太餓、定係隻雞太香太吸引。雞一放落碟佢已左手攞夾，右手揸煎預備同佢分屍，我大叫三聲 ＂咪住！＂，但佢完全冇打算停手，直到我再大叫 ＂喂喂喂，等陣！＂佢至望我一眼。

我問：＂你冇反應嘅？＂

答：＂以為你叫個女 ＂咪住！＂

我話：＂我個女都冇郁。＂（滴汗）

見佢咁趕，我好求其地影左兩張。所以懞懞地！

By the way, 隻雞好滑，胸都唔鞋，非常 juicy，懶人版有咁嘅效果，我好滿意！為自己鼓掌（唔知醜！）！

自家製海味小吃

繼瘋生果後，趁大年初一在家無所事事，從冰格把之前買的小扇貝及廣島蠔溶雪，頂備下午瘋一瘋。

先用薑蔥水拖一拖，之後隔水、索乾，可以開始調味。

我跟谷友用魚露，並加了紹酒，小量玫瑰露，胡椒粉，蜜糖。

因為是海鮮及有少許汁料，所以用吸油紙，以便清潔。

7小時後已差不多了。

嗯，中空位置的是我拿了＂試吃＂。

由於是第一次，而且怕多吃了會胃痛，所以就只瘋了這少少一盆。

少吃多滋味，多吃壞肚皮啊！

高媽再顯身手之 - 團年飯

娘親番香港後，我煮了三、四餐，實在冇意慾再煮，吃力不討好，一係就叫我求求其煮。結果，求其又好難吃，比心機又話唔啱口味！一於罷煮！

差不多兩個月了，有少少手痕，今次由我發板，唔再比人亂七八糟咁去街市買完野番黎，堆哂喺個廚房度，然後話：" 交比你啦！"  。

我唔係一個好識煮野嘅人，但我又有少少要求，想試新餸，唔想求求其其煮熟就算，比人就咁買野番黎叫我煮，我又冇 idea 點整，結果就當然冇心機整啦！試過有人話：" 不如煎扒呀，我去買。" ，結果真係扒，只得扒，冇配料、冇菜，連蕃茄、薯仔都冇。乾吃扒！

今次四餸一湯，由我話事，爽！

骨膠原源廣進

罐頭鮑魚+花膠+鵝掌+北菇+生菜

汁用罐頭鮑魚的汁，再加發花膠的膠汁、雞湯、蠔油、豉油、老抽、糖等，伴勻加熱後把鵝掌、冬菇先放入鍋內，慢火炆至大約個半鐘，開飯前半小時再把鮑魚、花膠放入。

炆 - LC 20cm round

用滾水淥一淥生菜，放上已預熱扁鍋上，待用。

炆好後連汁連料倒進扁鍋。

上檯 – LC 26cm buffet

金蠔蜜蜜煎 

金飯碗嘅金蠔，揀左 8隻珠圓玉潤嘅黎試煮

金蠔解凍後，用水沖一沖，蒸5分鐘，抽出竹簽

凍鑊凍油、金蠔落鑊煎香

倒進蜜糖，兜勻後即可上碟

噢, 大愛 LM圓碟終於開光了！

花團錦簇

鬼嫁的食譜，請看連結。

http://oniyomeryori.blogspot.hk/2013/12/blog-post_18.html

幾驚隻 18cm LM仍然無用武之地！好彩隻椰菜夠細，鬆開椰菜後剛剛好！

芝士哈哈伊麵

也是鬼嫁的，請看連結，我只是加了大蝦。

http://oniyomeryori.blogspot.hk/2012/04/blog-post_09.html

LC 24cm risotto

足料花膠煲雞湯

LC 24cm round - 噢，這相片是年29晩影的，預早一晚㷛，皆因雪櫃已冇位放雞！

總結，今日紫色贏哂！3紫㷛1紫碟搭1隻kiwi，好滿足 :))

風乾了的蜜餞柑橘

跟谷友做的蜜餞柑橘，街市賣$14/1磅，買左1磅小試。

星期日襯阿女瞓晏覺，即時開動努力瘋！

洗淨柑橘，抹乾水、切片 (約3mm)

於柑橘片底、面掃上小量蜜糖

再放上不黏紙上

70c / 8-9小時

我6個鐘的時候偷吃了一塊，味道就似街買的，但還可以乾一點點，但要上床睡了了，所以再調度數及時間，48c / 8小時。

結果，醒來時已變了 "柑橘蜜餞乾"！

1磅已填滿兩隻果醬樽，分裝了一隻小樽帶回公司放毒，同事大愛，瘋乾熱潮應該會有增無減。

還有很多想瘋：一口牛、多春魚、蠔豉、紅肉火龍果、凡立貝、菇、蒜、蔥等等！不能盡錄。

暈車浪

冇陰功，囡囡遺傳左我d衰嘢 ~ 暈車浪。

坐巴士，北角到銅鑼灣，嘔。

坐旅遊巴，去到屯門公路，嘔。

坐巴士，北角到金鐘，嘔。

頭一次我一身都係，算，但見個女咁辛苦，肉都赤埋。

下星期要去尖東食飯，隧巴最方便，但怕阿女辛苦。算，仲可以揀地鐵。

初四參加左新春本地遊，二月中又有學校安排嘅生態農莊一日遊，點算呢？

急急搵人求救！

暈車浪

大力按住合谷穴

即指公同食指之間手背的肉

冇肉手一隻，大約心心位置就係合谷穴，按落去酸酸麻麻至有用㗎！

上車開始按

正常係20-30min,  

亦可以舒服就放手

否則可以按到落車

最好可以用毛巾仔滴幾滴尤加利(澳尤或藍膠) 精油，得閒索幾野。

網上資料：

出現輕微噁心欲吐癥狀時，可用力按捏“內關穴”(內關穴位於前臂掌側，手腕橫皺紋的中央往上約三指寬的中央處)緩解癥狀；也可帶幾個新鮮的橙子或檸檬，感覺不適時切開食用，清香的氣息也能緩解噁心欲吐的癥狀。

內關穴:

瘋乾

嗜好太多實在對苛包有損。一直想有部食物風乾機，外國牌子較貴，甚至係外國牌子大陸製造，價錢是外國製的三分二左右，心大心細，不如買國貨吧。但睇來睇去，國貨的品質實在.... 有風險！

最後找到這個香港貨，BPA Free, 心理上踏實啲，價錢又吸引，就你啦！

風乾機兼有低溫慢煮的好處，可保存食物營養，街買的生果乾少不免有添加濟，我一把年紀沒太大關係，但小朋友呢，在我可控制範圍之內，還是盡量少接觸吧。

小女非常胃食，害得我想食零食時要做賊一樣，偷偷吃（記得抹咀啊）！有了風乾機做自家乾果，就可以光明正大地吃了，你一片，我一片，𨍭眼一瓶就吃完！

現在每天都要努力切切切、乾乾乾！朝早開始乾，夜晚收成；夜晚乾，朝早收成！比我上班時間還要長！

待有存貨後，我還打算乾菇、蒜、蔥、芫茜等，想煮個湯麵時不再需要雞湯、雞粉、濃湯寶了，只需要把乾材料每樣撒一把滾個湯，加少許鹽就成了！太好！