星期六買了排骨，再挑戰數字骨。
跑活水後沖乾淨
煮汁：
1tbs 紹興酒
2tbs 生抽
3tbs 糖
4tbs 鎮江醋
5tbs 水
今次用我心愛嘅 LM 18cm round，汁滾左之後將排骨放落去，再滾後加蓋轉細火，煮15分鐘，熄火，半小時侯再開小火15分鐘。
之後視乎汁嘅情況，多汁則開蓋繼續㷛至收汁。
大功告成！今次個味似出街食啦！
2014年5月19日星期一
蘿蔔清湯腩
母親節時，見一眾谷友喺屋企煮大餐，芸芸相片中，出現率頗高嘅有呢一味清湯腩。
星期一因為個女病左，請左一日假，手痕想下廚，用埋煲個去濕湯水，於是一早出街市睇吓仲有冇坑腩。呵呵呵… 買到啦！
食譜唔再多講，見大家都用玻璃朱，我都玻璃朱啦！貪佢簡簡單單嘛！
我用左;
大半斤坑腩
水 - 緊緊蓋到牛腩 (所以可以比原食譜嘅水要多)**
月桂葉---15片左右
八角1粒
花椒1茶匙
白胡椒粒1.5湯匙
冰糖1湯匙
(因為我水多左，所以其他材料都差不多跟足)
跑活水
水滾，滾多陣先
問題來了，個半鐘後，牛腩已經夠淋，但味道就左少少。
我相信問題在個…… 煲。
㷛大，肉細
**本來想用22cm round，但怕放唔落蘿蔔，於是用左 24cm round，但變相水會落多左。
所以下次都係用 22cm round 會好啲，味道會濃郁啲！但蘿蔔好好味。
相信清湯腩個靈魂在於個月桂葉，我做個另一個版本，得三樣材料：牛腩、月桂葉、水。就係咁簡單！
煮嘅時候我個心都係一半一半，得唔得架？就咁？但臨到差不多煮好，加左鹽之後，噫，又得喎。
所以，兩個食譜，同一做法，只係材料上有少少分別，口感一樣。味覺上，一個係好專一嘅清湯腩，另一個係味道層次豐富啲嘅清湯腩。邊個好食啲？等我用個細煲到一次成功嘅玻璃朱清湯腩再 update。
2013年11月24日星期日
懶主意 - 蕃茄哈哈粉絲㷛（附食譜）
星期六，去到街市，除左買料炆定星期日嘅羊腩煲之外，仲要買當晚嘅餸。
太后星期五晚飯時胃口不佳，因為之前食左好多雜糧喎！結果有餸剩，但每樣dd，頭都大埋！
冇乜煮意，又唔想再蒸魚，不如整個蝦。想食泰式粉絲蝦㷛，但好似唔啱阿女食，不如....
蕃茄肉碎粉絲㷛變奏版：蕃茄哈哈粉絲㷛！
食材：
一兜蝦 脫殼洗凈
4隻蕃茄 去皮切粒
一扎粉絲 浸軟
調味：
茄汁適量
糖
生抽
老抽少許
配料：
薑幾片
蒜粒若干
起鑊下油，爆香薑蒜，落蝦爆炒至8／9成熟，撈起備用。
另起鑊下油，兜熟蕃茄，下茄汁、老抽、生抽、糖，試味。加入粉絲撈勻，今粉絲吸收汁料，放蝦再撈一會，熄火，上碟，開飯！
2013年11月23日星期六
蕃茄肉碎粉絲㷛 (附食譜)
阿女鐘意酸酸甜甜，做阿媽嘅間唔中都會投其所好，比佢興奮吓！
呢個餸材料簡單，做法容易，懶人餸一個！今次落場嘅係 20cm Bis。
材料
材料
免治豬約 $10
粉絲一包濕軟後剪開數段
中型蕃茄 3隻切粒
醃豬:
生抽
胡椒粉
糖
粟粉
水 (適量)
油
汁料:
茄汁: 生抽 比例 2:1
(兩份茄汁: 一份生抽)
糖 適量 (可溝完試一試味先)
做法:
1) 先炒豬肉碎
2) 再下蕃茄粒同炒
3) 落汁料兜勻後下粉絲煮至粉絲夠林 (怕乾可再落少少水)
完成!
2013年8月24日星期六
三心兩意骨 (附食譜)
想清左雪櫃包腓排，三心兩意，又想黑啤炆，又想做三杯骨
腓排$3x
腐乳2.5-3磚
糖少少
生抽
老抽
醃好腓排落鑊爆一爆倒少少水轉細火加蓋焗大概10-15分鐘 !
訂閱：
文章 (Atom)