2013年12月6日星期五

我的心思是我的

你覺得重要的事,請用心記著;你想要記住的事,請用雙眼留心地看;別要初一十五,今天問這,明天問那。

 

明白你貴人善忘,但科技發達,請你把想要記下的事 screen cap 了,有空再放到行事曆。

 

以後,我會把這些通知你的事都 screen cap了,你再問,我會用 screen cap 覆你,我的時間,不是浪費在你善忘的個性身上。

 

口口聲聲說女兒是你命根,凡事都要我通知你,可是你又不上心,19號的事,你問我是不是下星期三?!?! 你預約了要探女兒帶她去玩,到時卻問我可以去那裡。對不起,我只是陪行做阿四,你探女兒時,只要小娃娃願意,所有時間都是你的,請你一早作出安排,我的心思不是花在如何讓你 entertain 女兒的!

 

疼愛女兒,不是用口說 "女啊!女啊!",請你用 ~ 心。

2013年12月4日星期三

太后宴客

太后有朋自遠方來,仲為佢空運魚杆一枝,太后大喜,決定設宴款待!

 

此朋友吃盡大陸美食,太后實在傷透腦筋,於是決定趁季尾在家以蟹宴招呼貴客。

 

我星期一晚收到通知於星期二晚設宴。太后提議說吃蟹加湯麵。我說就只湯麵招呼,不太好吧。家有豬軟骨,不如再來一個蝦或雞,再加青菜一碟,又或是一鍋壽喜燒可好?太后嗯嗯,不知是否接納。

 

星期二,我還是不放心,午飯時發短訴給家傭,說買只雞加一點菜吧,如果太后預備了海鮮或其他,那只雞就留待我們星期三吃好了!

 

傍晚六時多沖沖趕回宮看看如何執漏,才發覺"執漏" 二字實抬舉了太后。應該用 "未開始" 會比較恰當。

 

傭人已盡量安排,蒸蟹的鍋子已加了水預備好;調蟹醋的薑已切好,只是切得不夠;一小碟肉絲及一小碟雪菜備用,相信是炒的吧;有一包上海麵線在旁;有一鍋大荳芽豬骨湯。

 

我問傭人,我的雞呢?她說,太后說夠了。我再問,我的菜呢?她說太后說湯裡有大荳芽,不用了。然後傭人問我,蟹呢?什麼?買蟹的不是我呢!原來太后把蟹藏了在雪櫃菜格。於是慌忙拿出洗刷,我則負責多切一點薑。太后終於對晚飯有一點關注了,走進來問,需要我幫手嗎?那刻,我無言以對。再望著廚房,就只有少少一份豬軟骨、小小一份雪菜肉絲,每人兩只蟹。她就好意思請兩個朋友回來吃飯。

 

吃完了蟹,傭人把麵線及小菜拿出,那碟小小的肉絲,放在我的LC心心碟,實在顯得有點凋零,是碟太大?還是餸太少?麵卻是多的,每人滿滿一大碗。

 

我真的汗了,只想份一頭鴕鳥,把頭埋進地下去。



2013年12月3日星期二

食、玩、瞓

看到新聞,見一個母親親手將自己6個月大、被焗死了的女兒掉到後樓梯,實在很難作出反應。枉我從來覺得自己接受外來事物能力高,但今次無論如何也想像不到,自己的女兒沒了呼吸,做媽媽的不是第一時間報警求助,而是苦思如何瞞天過海。不知她把女兒放進膠袋,再放入小提琴盒的時候,心裡在想什麼。

 

對比起這樣的淪常悲劇,我女兒應該是很幸福了。她爸爸在我眼中雖然已經是一無是處,但起碼疼愛女兒。而我,則繼續放任女兒過另類學習。

 

除了兩歲幼兒班,我們不上其他課外活動,不學跳舞,不學畫畫、不上親子音樂班、沒有參加任何playgroup!幼兒班還是下晝的,樣她瞓個飽。天氣涼了,連我自己也不想起床,我不想女兒這麼早就要過這樣殘忍的生活。

 

週末,我們盡量四處去,有大顆兒的節目當然好,沒事我兩也盡量出去走走,就算是菜市場也去,看看多種蔬菜、生果、海鮮也是一種學習。

 

我見有這家長,把幼兒當神童一樣去教,莫非起跑線真是那麼緊要?只是兩歲多的小人兒,可否還他們一個快樂童年?

 

最好笑的是,那些家長的指定答案都是說:  "他很喜歡上X X班啊!"。

 

嗯,有沒有想過,如果不用上 X X  班,只要家長多花時間跟他們玩耍,小朋友也可以很開心啊。

 


四處去看聖誕燈飾也是很好的節目啊!

2013年11月28日星期四

中環聘珍樓

好把閉咩!今朝打去中環聘珍樓幫老闆訂房食飯。接電話位男士態度認真………. 麻麻地。一間食店搵個咁嘅人接電話接booking,同倒米冇分別!
 
我老闆通常每兩、三個星期總要去一次開飯,通常都訂房。早排老闆成日飛,有幾個星期都唔係香港。終於今日話同客食飯,叫我訂房。

打到去,呢位男士話…
 
"房?我地有最低消費嗰喎!"(乜我把聲似死窮鬼比唔起錢食飯?)
 
我話我知。
 
跟住佢又問我: " 有菜單未呀?" (我心諗,你瞓醒未?我剛剛至同你講訂房,何來菜單呢?算,我再忍你!)
 
我話: "未有!
 
"咁我地仲要收你按金喎!"
 
"我地以前同你地訂房,從來都唔使做 deposit喎!"

"哦,因為太多人訂左又唔黎啦,我地房得好少,所以而家要收 deposit!"  (佢語氣唔係誠懇嗰仲,係好似話緊 "你地班人呀,訂左又唔黎… )
 
"開始左幾耐呀?"
 
"都個幾月架啦,即係你老闆都個幾月冇黎啦!" (我火都黎埋!再忍一忍你!因為你未夠級數要我開口鬧你!)
 
"如果用 credit card做 deposit係咪就咁比number你?"
 
"唔係呀,要親身黎!"
 
講到呢度,我已經想講xyz..  你喺我樓下咩,要我親身黎?仲以為去左邊間米X蓮幾多星餐廳!
 
跟住佢話..
 
"我 fax左菜單比你先啦!"
….
 
鬼唔望我老闆 black list左你,我以後唔使打電話黎受你氣!
 
最後,我打電話去中環小南國,接電話位女侍應就有禮貌得多啦!我一講老闆名,佢已經知係邊個,仲話 "啊,最低消費,你老闆知架啦,咁上吓都得架啦,X先生成日黎,得架啦!"
 
嗱,呢啲咪人話囉,學吓啦!做飲食行業,我個人都未黎食,你已經令我不快,你叫我點幫襯你呢?
 
我對人不對事,每間餐廳都有自己嘅 policy,你地有新規矩保障自己,我冇問題,但你語氣傲慢,惹人生厭!所以我要開名!嬲得我… 最衰冇問你老豆姓乜!

2013年11月26日星期二

愛我 別折磨我

一個懂你的男人不一定愛你, 而一個愛你的男人不一定懂你。 遇到個懂你卻沒心愛你的男人,那是你的災難。   遇到個愛你卻不懂你的男人,那是折磨。

2013年11月25日星期一

只懂問廢話!

今朝番到公司,雖然好忙,但還算暢順。點知一個電話,令我頂頂頂住道氣!

我知全城家長極度恐慌,驚自己個仔女會比人搶左。

某人緊張,我都好明白,我都擔心,但除左拖實及金精火眼 look 實之外,我只可以話:小心!小心!小心!

電話對答如下:

"姐姐 (工人)送個女番學有冇問題?"
"有咩問題?"
"即係姐姐一個人帶佢番學得唔得?"
"吓?佢地日日行番學,咩得唔得?"
"我意思係安唔安全?"
"吓?行番去算唔算安全?"
"我係話搶細路嗰單新聞,得姐姐同佢番學安唔安全?"
"唔係姐姐送嘅話,咁應該邊個送呢?" (差 d想問佢係咪打算請保鏢包接送!)
"我知,咁你有冇出個電話比姐姐?"
"吓?又出?佢已經兩個電話囉喎。"  (妖,個姐姐已經做左就快3年,唔通會冇電話?)
"咁有冇叫姐姐打比你?"
"打比我做乜?"
"同你講幾時出門口、係咪安全番到學校/屋企囉!"
"吓?唔係嘛?我從來冇叫佢打喎。有事佢自然會打比我!打左比我唔代表會安全啲囉!"
'……"

跟住佢好冇癮地收皮!

見到單咁嘅新聞,好多家長都會擔心,但佢所有問題都係"零"建設性,廢話!咁叻佢自己日日去包接送囉!再唔係困個女喺屋企,三步不出閏門好唔好?

如果阿女第時 d表達能力好似佢咁差,我一定好早死!

2013年11月24日星期日

懶主意 - 蕃茄哈哈粉絲㷛(附食譜)

星期六,去到街市,除左買料炆定星期日嘅羊腩煲之外,仲要買當晚嘅餸。

太后星期五晚飯時胃口不佳,因為之前食左好多雜糧喎!結果有餸剩,但每樣dd,頭都大埋!

冇乜煮意,又唔想再蒸魚,不如整個蝦。想食泰式粉絲蝦㷛,但好似唔啱阿女食,不如....

蕃茄肉碎粉絲㷛變奏版:蕃茄哈哈粉絲㷛!

食材:
一兜蝦 脫殼洗凈
4隻蕃茄 去皮切粒
一扎粉絲 浸軟

調味:
茄汁適量
糖
生抽
老抽少許

配料:
薑幾片
蒜粒若干

起鑊下油,爆香薑蒜,落蝦爆炒至8/9成熟,撈起備用。

另起鑊下油,兜熟蕃茄,下茄汁、老抽、生抽、糖,試味。加入粉絲撈勻,今粉絲吸收汁料,放蝦再撈一會,熄火,上碟,開飯!