懶主意 - 蕃茄哈哈粉絲㷛（附食譜）

星期六，去到街市，除左買料炆定星期日嘅羊腩煲之外，仲要買當晚嘅餸。

太后星期五晚飯時胃口不佳，因為之前食左好多雜糧喎！結果有餸剩，但每樣dd，頭都大埋！

冇乜煮意，又唔想再蒸魚，不如整個蝦。想食泰式粉絲蝦㷛，但好似唔啱阿女食，不如....

蕃茄肉碎粉絲㷛變奏版：蕃茄哈哈粉絲㷛！

食材：

一兜蝦 脫殼洗凈

4隻蕃茄 去皮切粒

一扎粉絲 浸軟

調味：

茄汁適量

糖

生抽

老抽少許

配料：

薑幾片

蒜粒若干

起鑊下油，爆香薑蒜，落蝦爆炒至8／9成熟，撈起備用。

另起鑊下油，兜熟蕃茄，下茄汁、老抽、生抽、糖，試味。加入粉絲撈勻，今粉絲吸收汁料，放蝦再撈一會，熄火，上碟，開飯！