曾幾何時，我非常苦惱如何為女兒拍照。見到可愛的 backdrop或佈置，她只顧面向佈置欣賞讚歎 : " 媽咪，睇吓！"，如果硬要把她擰過來面向相機，她就不笑了。
但突然 ~ 真的是突然…
星期日約了公公吃晚飯，途中經過太古坊，到處都是聖誕裝飾，小人兒當然心花怒放，突然她走到一片燈飾前，然後面向我，說 : "影相呀，1 – 2 – 3 ！" 好在我反應還算快，在她數一時已預備好相機 :)
原來，小朋友會在你日日看顧之下，不經不覺地長大。
女，等一等媽媽，你大得太快了，我追不到啊！
2013年12月17日星期二
2013年12月13日星期五
痛。痛。痛。
上星期五番番下工，電話響，係阿媽打黎，跟住聽到強勁嘅喊聲，阿媽話阿女整翻左兜剛剛煮好嘅湯粉，淥到隻右手，又唔肯比人沖水降溫，同佢搽左燙火膏，但仲好淒涼。我話用個密實袋裝啲冰同水比佢敷啦。之後叫佢屈濕張相黎望望，睇落係傷，但都好似唔係好大鑊。跟住我望下個鐘，午飯喎，不如番屋企睇睇。於是拿拿聲趕番去。
嘩，阿媽張相嘅表達能力之低，實在…..
隻手紅哂，手指又有大水泡、手碗又有大水泡，手背個大泡仲穿左，皮都甩埋！又冇敷冰袋！我一手接過個女，冇陰功，心都實哂，即刻打電話比醫生，好在仲未去食飯，即刻抱阿女去睇。平時都覺得醫生好近，嗰日，行到斷氣都未到！
醫生見到佢隻燒豬手，都話陰功囉，一定好痛啊。比左消毒藥水、燙火膏，早晚兩次。
番到屋企，整左個冰袋比佢，佢慢慢放左隻手仔上去，好囉，咁咪清涼 d 、舒服 d 囉。點解初初佢地唔可以慢慢比佢試下敷冰袋呢？燙傷好痛架，我比個髮卷辣親，都浸左45分鐘冰凍水啦。家陣我個女隻手 slow cook 左咁耐，點解你地唔諗諗方法呢？手碗有個泡又唔知，嗰個位完全冇理過，熟哂啦，你地聞唔聞到肉香？
全能嘅臉書又係時候發揮作用，有個曾經喺醫院 burn unit 做過嘅護士同我講，咁細隻手仔淥親，可大可少，唔知裡面有冇事，你都係帶佢去醫院檢查下好啲。於是我又抱左個女去醫院，即時被分流為半緊急，仲係坐急症室裡面等添。以為唔使等好耐啦，點知一坐就兩粒幾鐘。
Anyway，醫話係二級灼傷，因為神經末稍並未受損，所以亦係最痛嘅一種。睇完症，再等洗傷口及包紥，又再喊到拆天一樣，真係好可憐。切我肉好過。
之後幾日都要去診所洗傷口，頭兩日喊到將護士當仇人一樣，第三日有進步了，第四日已唔喊。之後可以自行在家洗傷口及換紗布，隔幾日至番診所比護士睇睇，冇需要則覆診都唔使啦。
重災區在手背冇左皮嘅一弗，要小心唔好被細菌感染，日日要洗要包。
希望囡囡快 d 好番。
2013年12月6日星期五
我的心思是我的
你覺得重要的事，請用心記著；你想要記住的事，請用雙眼留心地看；別要初一十五，今天問這，明天問那。
明白你貴人善忘，但科技發達，請你把想要記下的事 screen cap 了，有空再放到行事曆。
以後，我會把這些通知你的事都 screen cap了，你再問，我會用 screen cap 覆你，我的時間，不是浪費在你善忘的個性身上。
口口聲聲說女兒是你命根，凡事都要我通知你，可是你又不上心，19號的事，你問我是不是下星期三?!?! 你預約了要探女兒帶她去玩，到時卻問我可以去那裡。對不起，我只是陪行做阿四，你探女兒時，只要小娃娃願意，所有時間都是你的，請你一早作出安排，我的心思不是花在如何讓你 entertain 女兒的！
疼愛女兒，不是用口說 "女啊！女啊！"，請你用 ~ 心。
2013年12月4日星期三
太后宴客
太后有朋自遠方來，仲為佢空運魚杆一枝，太后大喜，決定設宴款待！
此朋友吃盡大陸美食，太后實在傷透腦筋，於是決定趁季尾在家以蟹宴招呼貴客。
我星期一晚收到通知於星期二晚設宴。太后提議說吃蟹加湯麵。我說就只湯麵招呼，不太好吧。家有豬軟骨，不如再來一個蝦或雞，再加青菜一碟，又或是一鍋壽喜燒可好？太后嗯嗯，不知是否接納。
星期二，我還是不放心，午飯時發短訴給家傭，說買只雞加一點菜吧，如果太后預備了海鮮或其他，那只雞就留待我們星期三吃好了！
傍晚六時多沖沖趕回宮看看如何執漏，才發覺"執漏" 二字實抬舉了太后。應該用 "未開始" 會比較恰當。
傭人已盡量安排，蒸蟹的鍋子已加了水預備好；調蟹醋的薑已切好，只是切得不夠；一小碟肉絲及一小碟雪菜備用，相信是炒的吧；有一包上海麵線在旁；有一鍋大荳芽豬骨湯。
我問傭人，我的雞呢？她說，太后說夠了。我再問，我的菜呢？她說太后說湯裡有大荳芽，不用了。然後傭人問我，蟹呢？什麼？買蟹的不是我呢！原來太后把蟹藏了在雪櫃菜格。於是慌忙拿出洗刷，我則負責多切一點薑。太后終於對晚飯有一點關注了，走進來問，需要我幫手嗎？那刻，我無言以對。再望著廚房，就只有少少一份豬軟骨、小小一份雪菜肉絲，每人兩只蟹。她就好意思請兩個朋友回來吃飯。
吃完了蟹，傭人把麵線及小菜拿出，那碟小小的肉絲，放在我的LC心心碟，實在顯得有點凋零，是碟太大？還是餸太少？麵卻是多的，每人滿滿一大碗。
我真的汗了，只想份一頭鴕鳥，把頭埋進地下去。
2013年12月3日星期二
食、玩、瞓
看到新聞，見一個母親親手將自己6個月大、被焗死了的女兒掉到後樓梯，實在很難作出反應。枉我從來覺得自己接受外來事物能力高，但今次無論如何也想像不到，自己的女兒沒了呼吸，做媽媽的不是第一時間報警求助，而是苦思如何瞞天過海。不知她把女兒放進膠袋，再放入小提琴盒的時候，心裡在想什麼。
對比起這樣的淪常悲劇，我女兒應該是很幸福了。她爸爸在我眼中雖然已經是一無是處，但起碼疼愛女兒。而我，則繼續放任女兒過另類學習。
除了兩歲幼兒班，我們不上其他課外活動，不學跳舞，不學畫畫、不上親子音樂班、沒有參加任何playgroup！幼兒班還是下晝的，樣她瞓個飽。天氣涼了，連我自己也不想起床，我不想女兒這麼早就要過這樣殘忍的生活。
週末，我們盡量四處去，有大顆兒的節目當然好，沒事我兩也盡量出去走走，就算是菜市場也去，看看多種蔬菜、生果、海鮮也是一種學習。
我見有這家長，把幼兒當神童一樣去教，莫非起跑線真是那麼緊要？只是兩歲多的小人兒，可否還他們一個快樂童年？
最好笑的是，那些家長的指定答案都是說: "他很喜歡上X X班啊！"。
嗯，有沒有想過，如果不用上 X X 班，只要家長多花時間跟他們玩耍，小朋友也可以很開心啊。
四處去看聖誕燈飾也是很好的節目啊！
2013年11月28日星期四
中環聘珍樓
好把閉咩！今朝打去中環聘珍樓幫老闆訂房食飯。接電話位男士態度認真………. 麻麻地。一間食店搵個咁嘅人接電話接booking，同倒米冇分別！
我老闆通常每兩、三個星期總要去一次開飯，通常都訂房。早排老闆成日飛，有幾個星期都唔係香港。終於今日話同客食飯，叫我訂房。
打到去，呢位男士話…
"房？我地有最低消費嗰喎！"(乜我把聲似死窮鬼比唔起錢食飯？)
我話我知。
跟住佢又問我: " 有菜單未呀？" (我心諗，你瞓醒未？我剛剛至同你講訂房，何來菜單呢？算，我再忍你！)
我話: "未有！
"咁我地仲要收你按金喎！"
"我地以前同你地訂房，從來都唔使做 deposit喎！"
"哦，因為太多人訂左又唔黎啦，我地房得好少，所以而家要收 deposit！" (佢語氣唔係誠懇嗰仲，係好似話緊 "你地班人呀，訂左又唔黎… )
"開始左幾耐呀？"
"都個幾月架啦，即係你老闆都個幾月冇黎啦！" (我火都黎埋！再忍一忍你！因為你未夠級數要我開口鬧你！)
"如果用 credit card做 deposit係咪就咁比number你？"
"唔係呀，要親身黎！"
講到呢度，我已經想講xyz.. 你喺我樓下咩，要我親身黎？仲以為去左邊間米X蓮幾多星餐廳！
跟住佢話..
"我 fax左菜單比你先啦！"
….
鬼唔望我老闆 black list左你，我以後唔使打電話黎受你氣！
最後，我打電話去中環小南國，接電話位女侍應就有禮貌得多啦！我一講老闆名，佢已經知係邊個，仲話 "啊，最低消費，你老闆知架啦，咁上吓都得架啦，X先生成日黎，得架啦！"
嗱，呢啲咪人話囉，學吓啦！做飲食行業，我個人都未黎食，你已經令我不快，你叫我點幫襯你呢？
我對人不對事，每間餐廳都有自己嘅 policy，你地有新規矩保障自己，我冇問題，但你語氣傲慢，惹人生厭！所以我要開名！嬲得我… 最衰冇問你老豆姓乜！
訂閱：
文章 (Atom)