太后駕到 - 羊腩㷛 (附食譜)

又係半年一度、每度半年，太后移駕窩居嘅時候。一想到周末要全天候服侍一老一少已令我非常苦惱。

經過上星期日自我虐待之後，我今次學乖了，先下手為強，炆定㷛羊腩先，星期日就可以冇咁緊湊。

我呢個係懶人版本。

食材：

羊腩 暫件

馬蹄 去皮

枝竹 浸軟切段

冬姑 厚切或原隻

配料：

南乳

麵豉

薑 （頗多，切厚片）

乾蔥頭數粒

蒜蓉小許

黑糯米酒少許

老抽

生抽

糖

水

我買嘅南乳、麵鼓係一包包的，暫時每樣用一包先。

做法：白鑊落羊腩炒至每邊微微轉色，灒黑糯米酒（我冇，灒左花雕）。

加水至蓋過羊腩，待水滾，熄火，撈起羊腩，用水洗淨，備用。

落油爆香厚薑片，再下乾蔥頭，之後下蒜蓉，兜勻後落南乳、麵豉。如果太杰身好難煮開的話，可逐少加水至溶解。

下羊腩、馬蹄、冬菇大兜亂，之後加水至蓋過羊腩，加生抽、老抽、糖，中火至滾，收細火加蓋炆30分鐘，熄火焗。

（我冇marmite 鍋，唯有用鑊炒，直至加水水滾後轉落 20 round 繼續炆。）

沖涼，瞓覺。

（由於我係早一晚開始炆，所以未落枝竹。如果係晩飯食，可在下午加枝竹。）

聽朝起身，開中火至滾，收細火炆20分鐘，熄火焗，其間加入枝竹，重覆炆至淋及入味。

**如果唔夠未，可再加南乳及麵豉，只要再爆香加水（或羊腩㷛汁）煮溶，加入羊腩㷛繼續炆即可。