做女嘅時候，行街、買衫、食飯、睇戲、唱K、宵夜是指定動作。
後來漸漸發覺自己鐘意嘅街舖小店逐漸搬上樓，宵夜小店消失，變嘢連鎖茶餐廳。行街意欲越黎越低，因為一街都是三五成群嘅自由痕，零售業 sales 當香港人透明，見到 Lu Lu 即時變四萬！
唔行街唔緊要，要番工卦？地鐵站不時見到班自由行一家大小連姨媽姑姐，隔著三、四碼距離講嘢，雙層巴士隔住留上留下傾計。大家應該領教過。
後來要做媽媽啦，第一次做產檢，檢完坐底聽醫生講嘢。首先唔係教我養胎，係比私完床位booking我睇，叫我盡快book，否則.... 幾荒謬嘅事，香港政府中門大開放人黎生！2011年結果係出生率最高！
跟住到奶粉荒，好在我唔係住重災區，預多少少存貨，問題總算不大。但有 mama 朋友嗌哂救命。
健康院絶對要用＂淪陷＂兩個字，一個bb跟起碼3個大人兩隻喼。阿媽、阿爸，阿媽個阿媽坐哂3張櫈，喼都有得坐！叫佢地讓坐，佢斜斜眼望下你，然後屎弗移過半寸！唔該哂！
入幼兒園，我都避開一眾名校，但交表、簡介會，唔難發現一堆新香港人。
租金越黎越貴，小舖小店今日摺一間，聽日摺一間。去老銅想好求其食碗麵已經好難搵。住宅租金都係有上冇落，睇黎好快要比被迫退出港島！
所有嘢都影響緊民生，我地已經冇過正常生活好耐，平平地食餐晏啫，乜剩係得南記、麥記、大快活、大家樂、吉野家？文具精品店呢？大眾商務天地！行mall，全部都係大牌子，冇驚喜！
社會已經出現斷層，貧者越貧富者越富。中產裡面，如果覺得以上所有問題對你冇影響，咁我恭喜你，你已升呢做大富人家、衣食無休，唔使標籤自己係中產啦！但喺大富人家之下，仲有一班上唔到樓，捱貴租、供書教學嘅中低產，夾到變屎餅，政府冇配套，只係傾向地產霸權同大陸人。
香港人掉垃圾$1500，大陸人可以䢫便放低幾兩金。成日話想擴大稅基，咁唔該整個入境稅佢地歎下，一百幾十幫補下，黎得香港旅行，唔係比唔起掛！然後所有公眾泳池、博物館、大空館等等，提高對非香港人收費；如果要比$班 Lu Lu 都去嘅話，咪當係額外清潔費囉！
我撐學生，我對佔中從來有保留，因為我覺得唔 work。但事已至此，已經有十幾萬人出左黎，雖然我仍然覺得係冇結果，但用十日八日去叫醒更多扮瞓覺嘅人，比壓力呢個無能政府，同埋同一時間比你睇清楚學生／市民嘅理想，加另一方嘅黑暗面，好多牛鬼蛇神原形畢露，非常精彩。
我冇去瞓街，我有個女要照顧，只可以做 keyboard fighter 同埋供應有限嘅物資比支持者，要出街我都特登兜路去示威區，落到去，你會發覺公民廣場已經衝出政總，嗰個氣氛，係唔可以用文字形容。
尋日下午嘅老銅，時代嗰邊仍然係拖喼自由痕勝地，舖頭全部有開，鵝頸橋仲係好多人買餸，好太平。其實要去街嘅人照樣可以去街，減少小舖嘅埋怨。我真係完全唔覺得條街有危險（樣衰者另計）。
沒有留言:
發佈留言