正能量中心（反示威者無須看）

如果你番工番到一肚氣、比屋企工人姐姐激到一肚氣、小朋友冇得番學所以湊小朋友湊到好攰、6299好煩....... 如果你因任何原因覺得自己好多負能量，我介紹你去兩個地方。

金鐘（中環）
上星期一、二、五要番工，放工時間特登由中環怡和大廈行落干諾道中。中環段人唔多，慢慢行，沿途好多加油、鼓勵嘅標語，沿路見到有啲係一個人靜靜坐埋一邊，但個樣一啲都唔無聊，因為佢地都有一個使命... 再行，會見到有啲巿民，一個或兩個，去問學生關於民主、佔中、將來嘅問題... 再行，經過物資站，同學義工好似工蟻咁收拾整理物資，行前啲，有人整番好吹甩嘅橫額。因為冇車行嘅關係，空氣好好、好舒服、好和諧。去到金鐘，人比較多，亦要誇欄至可以番入海富，有男生負責守住佢地臨時搭出黎嘅梯、木板，幫啲論論盡盡嘅人：例如我，誇過去。

銅鑼灣
地理環境關係，老銅個天空細啲，人又密啲，但仍然比到好祥和、好融洽嘅感覺。如果時間啱，仲可以留喺帳篷邊，上番堂民主學堂，又或者過去留言版寫番幾句說話。早兩日仲見到一個大營外面痴滿標語留言，坐喺裡面打坐唔知咩感覺呢？

旺角我冇深入陣地，但應該同老銅好唔一樣。MK有自己一套文化，我諗有機會我會去感受一下。

其實一般情況之下，示威區都好安全，大家唔使太過緊張，得閒去幫趁下附近啲小店，幫補下佢地，咁佢地就冇咁多怨言，大家都開心啲、正能量高的！仲有，要去趁早！