新疆紅油馬尾髮菜

話說上星期開始辦年貨，去左金飯碗入貨。其實原意只係去 pick up 留左貨嘅 3 支櫻花金箔清酒，點知。。新彊紅油馬尾髮菜、日本天白花菇、本地蜂場冬蜜。。仲有唔知乜，已經唔記得。

番到屋企，成袋放低喺廚房，留比姐姐善後。

尋日大年初一，要食齋，執哂啲材料出黎打算開工煮齋，揾來揾去，就係差包紅油髮菜揾唔到。唔通留左喺舖頭冇攞到？

今朝姐姐未去街，於是問佢見唔見有包黑色好似頭髮咁嘅物體，係我早幾日連埋啲蜜糖冬菇一齊買番黎嘅呢。。。。

姐姐話 "吓，嗰包係頭髮黎嘅?"

我話唔係，只不過好似頭髮咁啫，我尋日想煮，但揾唔到啊。

跟住佢就行左入廚房，同我講 "哎呀，我以為係用黎做清潔嘅嘢黎添，仲諗點解會咁貴！" 然後伸手去擺清潔用品嘅地方拎番包髮菜比我！

真係好在佢冇拆出黎抹地！